Arbeidsinnvandrarane er attraktive innbyggarar for kommunane på Vestlandet, anten vi snakkar om små eller store kommunar. Med eit næringsliv med stort behov for arbeidskraft og mange kommunar som er på jakt etter fleire innbyggjarar, er det opplagt at den sterke arbeidsinnvandringa dei siste åra har vore og vil vere viktig for utviklinga på Vestlandet.  Samtidig veit vi at mange kommunar gjennom ulike kampanjar har arbeidd for å lokke nye innbyggjarar. Pussig nok er desse ressursane, med enkelte heiderlege unntak, i liten grad retta mot arbeidsinnvandring.

Gjennom ei kartlegging av kommunane på Vestlandet, gjennomført av Møreforsking i samarbeid med Vestlandsrådet og andre sentrale forskingsmiljø på Vestlandet, ser vi at berre ein mindre del av kommunane er proaktive i arbeidet med arbeidsinnvandring. Her har mange kommunar ein jobb å gjere i forhold til å definere si eiga rolle og legge til rette for at arbeidsinnvandrarane kan bli ein ressurs for eigen kommune og heile regionen.